لکھنؤ 17/ڈسمبر (ایس او نیوز/ایجنسی): یو پی میں بی جے پی کو اُس وقت سخت مشکلات کا سامنا کرنا پڑا جب  سینکڑوں ارکان اسمبلی نے اپنی ہی حکومت اور وزیر اعلیٰ یوگی آدتیہ ناتھ کے خلاف محاذ کھول دیا۔ اتنا ہی نہیں اطلاعات کے مطابق تقریبا 200 ارکان نے اسمبلی میں دھرنا بھی دیا، جن میں حزب اختلاف کے ارکان اسمبلی بھی شامل رہے۔

اسمبلی میں یوگی حکومت کی اس طرح فضیحت ہونے کے بعد نائب وزیر اعلیٰ دنیش شرما نے ارکان اسمبلی کو منانے کی کوشش کی۔ دریں اثنا، اسمبلی میں ودھیاک ایکتا (ایم ایل اے یکجہتی) زندہ باد جیسے نعرے گونجتے رہے۔

 ذرائع سے ملی اطلاع کے مطابق   غازی آباد سے تعلق رکھنے والے بی جے پی کے رکن اسمبلی نند کشور گوجر ایوان میں تقریر کر رہے تھے لیکن انہیں بولنے کی اجازت نہیں دی  گئی۔ نند کشور کا الزام ہے کہ انہیں غازی آباد پولس نے تشدد کا نشانہ بنایا ہے اور  وہ اس بارے میں اسمبلی میں اپنا مؤقف رکھنا چاہتے ہیں  لیکن انہیں ایوان کے اندر بولنے کی اجازت نہیں دی گئی۔

ایس پی ایم ایل سی آنند بھدوریا نے کہا کہ کل تک اسمبلی ملتوی ہونے کے بعد بھی، بی جے پی کے 100 سے زائد   ایم ایل اے اپنی ہی حکومت میں نظرانداز ہونے کی وجہ سے ایوان میں دھرنے  پر بیٹھ  گئے۔ انہوں نے کہا کہ اس وقت حزب اختلاف سمیت 200 سے زیادہ ایم ایل اے حکومت کی آمریت کے خلاف دھرنے پر بیٹھے ہیں، جس کے ساتھ ہی  حکومت اقلیت میں ا ٓگئیہے۔ امید کی جارہی ہے کہ وقت سے پہلے ہی عوام کو بدکاروں سے نجات دلائی جائے گی۔

اپوزیشن لیڈر رام گوند چودھری نے کہا  کہ ان کی پارٹی کے ممبران اسمبلی ایک رکن اسمبلی کے اعزاز اور حمایت میں بیٹھے ہیں، وہ جب تک ایوان میں رہیں گے ہمارے ممبر اسمبلی بھی ان کے ساتھ رہیں گے۔ اس درمیان بی جے پی کے اراکین اسمبلی کی دستخط مہم شروع کرنے کی خبر ہے، ایوان کے اندر کچھ سادہ کاغذوں پر ممبران اسمبلی کو حمایت کے لیٹر پر دستخط کرتے ہوئے دیکھا گیا ہے۔ دستخط کس لئے کرائے گئے ہیں اس کے بارے میں کوئی معلومات نہیں ہے۔

بی جے پی کے 10 - 12 ممبران اسمبلی نے خود میڈیا گیلری میں آکر اس بات کی تصدیق کی ہے، لیکن یہ بھی کہا ہے کہ جس کاغذ پر دستخط کرائے جا رہے ہیں اس پر کوئی موضوع نہیں لکھا گیا ہے۔